ALEOSAN, North Cotabato -- Giimbestigahan sa kapulisan sa Aleosan Municipal Police Station sa pagpanguna ni Chief Inspector Edwin Abantes ang nahitabong pagbusikad sa granada nga miangol sa mag-uuma.

Nahitabo ang insidente alas 6:02 sa gabii niadtong Dominggo, Agosto 12.

Giila ang biktima nga si Aderiano Takandong Candole, 54, ug molupyo sa Brgy. Tomado, Aleosan.

Gibutyag ni Superintendent Bernard Tayong, tigpamaba sa North Cotabato Police Provincial Office, nga hubog nga miuli ang biktima sa iyang balay gikan nag-inom, uban ang mga silingan sa tindahan.

Nasayran nga dunay dala nga granada ang mag-uuma nga gisulod sa bulsa sa pantalon ug aksidente nga nahulog ug mibuto.

Nakaangkon og daghang samad ang biktima sa nagkadaiyang bahin sa lawas nga naigo sa mga tipaka sa granada.

Si Candole daling gitabang sa iyang pamilya ug gidala ngadto sa Aleosan District Hospital, apan gumikan grabe kini, gibalhin dayon ngadto sa Cotabato Regional and Medical Center sa Cotabato City. (Edgar E. Fuerzas)