KIDAPAWAN CITY -- Gisusi na sa mga sakop sa National Bureau of Investigation (NBI) uban ang mga testigo ang massacre site sa Kabacan, Cotabato niadtong adlaw nga Dominggo.

Usa-usa nga gipangutana sa NBI ang mga saksi kung paunsa nila nakit-an ang siyam ka tawo nga gipamatay sa lima ka wala malihing mga armadong kalalakihan.

Usa sa mga testigo ang nag-ingon nga bag-o nahitabo ang pagpamusil sa mga biktima, nag-atang na ang lima ka armadong tawo sa kalsada.

Pag-abot sa mga biktima sa provincial road duol sa USM Granary and Machinery sa Barangay Poblacion, Kabacan, Cotabato, gipakanaog sila sa ilang gisakyan nga mga motor.

Gipangitaan og ID ang siyam ka sibilyan pagkahuman gipamusil sila gamit ang M16 armalite rifles, M4 rifle og kalibre .45 nga pistola.

Dunay nadungog pa ang usa sa mga testigo sa mga gipamusil nga nagkanayon "mga sibilyan kami sir maawa kayo."

Gani gitiwasan pa sa mga suspetsado kadtong uban sa mga biktima nga buhi pa og gidul-itan sa ulo.

Uban sab sa NBI nga miadto sa massacre site si Kabacan Mayor Herlo Guzman Jr., ABC President Evangeline Pascua-Guzman ug mga opisyal sa barangay. (Edgar Fuerzas