NAGHANGYO ang mga kabanay ug mga kahigalaan sa duha ka mga biktima sa disgrasya sa kadalanan alas 2:30 sa kaadlawon sa Dominggo, Septyembre 23, didto sa R. Castillo Street, Davao City.

Sanglit daghang ang nakakuha og video ug hulagway sa crime scene, gipang-upload kini sa Facebook nga maoy hinungdan nga nag-viral.

Sa video niini nga nagkatag sa social media makita ang ngilngig nga hitabo nga maoy resulta sa kakusog nga pagkabangga sa island railings atubangan sa Green Oil Gasoline Station.

Ang mga kabanay naghangyo nga di nalang ipang-share ug irespeto unta ang namatay kinsa maoy naglingkod sa front seat, ug nagbitay na kini nga wa nay kinabuhi human sa disgrasya.

Subay sa journal sa Davao City Police Office (DCPO) giingong gimaneho ni Zaren Reigh Blanca Melgazo ang maong sakyanan nga dunay plaka numero LGD 602 kinsa kusog kaayo ang dagan diin nawad-an og kontrol nga maoy hinungdan sa pagkadaro sa island railings.

"Was moving too fast coming from north heading towards south direction as indicated by its strong impact accidentally its front portion collide into the island railings due to strong impact which resulted to damage of property and death of Dave A Evangelista," tipik sa spot report sa DCPO.

Ang drayber sa sakyanan nakahiagom og daghang samad sa kalawasan kinsa padayon karong gitambalan sa Southern Philippines Medical Center (SPMC).

Padayon ang gihimong imbestigasyon sa kapulisan sa maong hitabo. (Jeepy P. Compio)