MAGSAYSAY, Davao del Sur -- Gipasalig sa National Housing Authority (NHA) Davao Region nga di nila pasagdan ang mga katawhang nabiktima sa sunod-sunod nga linog human nawad-an og kapuy-an.

Mismong si NHA General Manager Marcelino Escalada Jr. ang nanguna sa pakigtagbo kang Mayor Arthur Davin aron ipahibawo nga mo-arangkada na ang ilang housing program alang sa mga pamilyang nahugmak ang mga balay sa linog.

Gidasig sab ni Davin ang mga biktima nga di mawad-an og paglaum ug dungan silang mobangon gikan sa pagkahagba sa kalamidad pinaagi sa tambayayong ug panaghiusa.

Niadtong Sabado, Disyembre 7, gihimo sa lokal nga kagamahan ang 'Operation Big Smile' alang sa mga batang naapil kabalaka sa linog didto sa Barangay New Opon ug Kanapolo.

Gilingaw sa lokal nga kagamhanan ang mga bata pinaagi fun-filled magical treat aron hingpit nilang malimtan ang trauma sa linog.

Sa pagkakaron, padayon nga nag-abot-abot ang hinabang alang sa mga biktima sa linog lakip na ang paghatag og pinaskuhan gikan sa mga sakop Davao City Police Office ngadto sa kabataan sa Barangay Barayong sa miaging adlaw.