TUNGOD sa subsob nga paggukod, mitahan ngadto sa kapulisan ang mga sakop sa organisado nga grupong kriminal kinsa mangilad gamit ang pangalan ni Mayor Sara Duterte-Carpio ning Siyudad sa Davao.

Sa pahayag nga gipagawas niadtong Miyerkules sa gabii, Agusto 4, 2021, gidayeg sa lokal nga panggamhanan sa siyudad ang National Capital Regional Police Office (NCRPO) ug uban pang yunit tungod sa ilang agresibong kampanya aron nga masubay ang mga miyembro sa grupong nangilkil og salapi gamit ang pangalan sa mayor ug uban pang mga opisyal sa City Hall ning dakbayan.

Base sa taho sa NCRPO, misurender ang mga suspek ngadto sa NCRPO niadtong Hulyo 30, 2021, ug gipresentar ngadto sa mga tigbalita, Agosto 4, 2021.

Gikanayon sa taho sa NCRPO nga ang grupo gialegar nga maoy nagpaluyo sa ilegal nga solicitation sa campaign funds alang sa kandidatora sa Presidential daughter sa 2021.

Matud sa lokal nga panggamhanan nga ang mga nahisgutan naila nga mga sakop sa Cerbito-Hernandez Organized Group. Nailhan ang mga suspek nga sila Patrick Orinio Cerbito, Ramon Segundo, Antonio Cerbito, ug Antonio Segundo.

Sumala sa taho sa CNN Philippines, gisulti ni NCRPO Legal Division Chief Lieutenant Colonel Joseph Orsos nga mga sindikato magpaaron-ingnon isip senior officials sa LGU aron nga mo-solicit og kuwarta alang sa "humanitarian projects," sama sa community pantries nga gamit ang pangalan sa presidential daughter.

Magpaaron-ingnon sab sila nga si Assistant Administrator Tristan Domingo sa Davao City aron nga mangalap og pundo aron isuporta gikan sa mga negusyante ug kontraktor alang sa pagdagan ni Duterte-Carpio alang sa pagkapresidente sa sunod tuig.

Giingon sab nga ang grupo migamit og chat apps ug social media sites, sama sa Viber ug Facebook, aron nga moteks ug motawag sa mga suplayer sa Davao, Dumaguete, Iloilo, Batangas, Quezon, Negros Oriental, Tarlac, Pangasinan, Cagayan, Leyte, ug Baguio aron nga mangayo og pundo.

Giandam na ang kasong syndicated estafa batok sa mga nahisgutan. (Ralph Lawrence G. LLemit)