BANSALAN, Davao del Sur -- Wa magtuo ang mga sakop sa Bansalan Coffee Farmers (Bacofa) nga mosikat sa laing nasud tungod sa ilang kape.

Gibutyag ni Marivic Dubria, marketing officer sa Bacofa, nga unang nawad-an og gana ang mga mag-uuma nga mananum og kape dihang miubos ang presyo niini.

Daghan sa mga mag-uuma sa Sitio Pluto, Barangay Managa gipamutol ang mga punoan nila sa kape kaniadto ug nibalhin sa pagpananum og gulay.

Apan, gihatagan sila og ayuda sa Department of Agriculture, hinungdan nga naaghat og balik og pananum og kape.

Apan wala damha, sumala ni Dubria, usa ka Arabica coffee farmer, nahimong mananaug ug nakuha ang unang ganti sa bag-ohay nga 2019 Philippine Coffee Quality Competition.

Gumikan niini, molupad si Dubria sa Estados Unidos sa Abril 11 ngadto 14 alang sa pag-representa sa Pilipinas ngadto sa Specialty Coffee Expo nga ipahigayon sa Boston, Massachusetts.

Si Dubria mipasalig nga iyang i-promotar ang kape sa lugar ngadto sa laing nasud aron mas ilhon pa kini sa mga langyaw.