KIDAPAWAN CITY -- Nakasinati og pagbaha ang Makilala ug Kabacan sa North Cotabato, lakip na ang dakbayan sa Kidapawan sa nagbuntag nga pag-ulan.

Sa Makilala, miawas na sa national highway ang tubig-baha gumikan migamay ang lutsanan sa tubig sa mga kasapaan sa bag-o lang nahuman nga 4 lanes nga kalsada.

Didto miigo sa kabalayan ang tubig-baha gumikan wala pa mahuman ang kanal kilid sa national highway.

Sa Kabacan, gibaha ang mga ubos nga barangay ilabi na kadto nga anaa kilid sa Pulangi River nga miawas sab gumikan sa grabeng bunok sa ulan.

Sa Maguindanao Province, gibaha sab kadtong mga lungsod nga anaa kilid sa Rio de Mindanao ug liguasan Marsh.

Nasayran nga mabaw na ang Rio Grande de Mindanao ilabi na kung kusog ang ulan hinungan nga moawas ang tubig ug kinahanglan na nga palawman.

Apan ang dredging operation sa Mindanao River Basin project wala mahinayon hangtud nga nakalimtan na lang sa gobyerno ang maong proyekto nga nagsugod sa administrasyon ni Pangulong Gloria Macapagal Arroyo.

Nanawagan ang mga lokal opisyal sa mga namuyo daplin sa mga kasapaan ug kabukiran nga magbantay sa bul-og sa baha ug pagdahili sa yuta. (Edgar E. Fuerzas)