USA ka taas nga opisyal sa New People’s Army (NPA) ang niampo sa sabakan sa balaod, kuyog ang lain pang duha ka kauban, uban sa ilang gitipigan nga tag-as nga kalibreng armas niadtong Miyerkules sa probinsiya sa Bukidnon.

Ang tulo giila nga si Benido Lambonay alyas Junjun, 29; Eyan Man-ukil Mandanoay alyas Garry, 20; ug Ely Manlangoy alyas Kinkin, 24, pulos taga Barangay Digongan, Kitaotao, Bukidnon.

Mga nahisgutan nitahan sa kaugalingon ngadto sa tropa sa 89th Infantry Battalion, Philippine Army nga naglusad og Community Support Program o CSP sa maong dapit.

Nasayran nga si Lambonay maoy pangulo sa political wing sa NPA nga mao ang Komiteng Rebolusyonaryo sa Baryo, samtang si Mandanoay maoy unit squad leader sa gerilya ug si Manlangoy, miyembro sa Milisiyang Bayan.

Ang tulo nahisakop sa Guerilla Front 55, Sub-regional Committee 5, Southern Mindanao Regional Committee, ang teroristang hut-ong sa Communist Party of the Philippines ubos kang Joma Sison nga nalambigit sa pangilkil, pagpatay, pagsabotahe sa mga ekipo sa gobyerno, nangrekrut og mga menor ug uban pa sa nahisgutang probinsiya.

Gitudlo sa mga nahisgutan kon asa nila gitipigan ang ilang mga armas ug sa pagsusi, militar nakarekober og duha (2) ka Garand rifles, duha (2) ka Carbine rifles, ug M14 rifle uban ang mga subersibong mga dokumento.

Mga nisurender nalakip na karon sa listahan sa uban pang nitahan kinsa giproseso aron nga makapahimulos sa Enhanced Comprehensive Local Integration Program (E-Clip) sa kagamhanan.

Si Colonel Nolasco Mempin, commander sa 1003rd Infantry (Raptor) Brigade, nagdawat sa bag-ong katikaran ug positibo nga uban pang mga rebelde mosunod sa pagtahan.

“The magnanimity of what these people with their firearms could do, adding to their radical perception against the normal, political norms, could have enormous implications in the peace-building efforts we, along with the communities and the whole government is painstakingly trying to build, this is why we thank the people who have complemented our efforts by adding social pressure for the rebels to finally surrender,” matud pa sa opisyal. (WGM)