TACURONG CITY -- Gisulong sa mga miyembro sa New People's Army (NPA) ang outpost sa mga sakop sa Citizen Armed Forces Geographical Unit (Cafgu) alas 9:30 sa gabii niadtong Dominggo sa probinsiya sa Sultan Kudarat.

Sa taho gikan sa Sultan Kudarat Police Provincial Office, nasayran nga gi-atake sa mga NPA ang detachment sa Cafgu sa bukiron nga bahin sa utlanan sa Lebak ug Kalamansig sa nahisgutang probinsiya.

Apan mga Cafgu daling nakabawos sa mga NPA ug nakigbahugbahog nga milungtad og 45 minutos.

Tungod niini, mga molupyo haduol sa lugar nangalisang hinungdan nga nanghapa sulod sa ilang balay sa kahadlok nga maigo sa mga saag nga bala.

Wa madugay, miatras sab ang mga NPA nga giingong gidumala ni Kumander Franco shuman nga nakatimaho nga nagsingabot ang mga sundalo nga miabag sa mga Cafgu.

Walay naangol o napatay sa mga Cafgu apan dili matino sa mga komunistang pundok.

Sa pagsuwat ning balita, padayon pa ang combat clearing operation sa mga Cafgu ug sundalo batok sa mga NPA sa Lebak ug Kalamansig. (Edgar E. Fuerzas)