MIPASAKA og kasong libel ug cyber-libel si Senador Emmanuel Pacquiao kagahapon, Septyembre 14, 2021, batok kang Kingdom of Jesus Christ founder Pastor Apollo Quiboloy, kinsa miingong ang senador nagwaldas sa paggamit sa kuwarta sa mga tawo alang sa usa ka proyekto sa iyang lungsod nga natawhan sa probinsiya sa Sarangani.

Mipasaka si Pacquiao og reklamo didto sa Makati Prosecutor's Office, kon diin nag-akusa kang Quiboloy sa paggamit sa iyang "power and influence to spread fake news and false information."

Si Pacquiao nangayo og P100 milyon nga damyos ug bayad sa abogado.

Nag-ugat ang reklamo ni Pacquiao gikan sa video clip nga gi-post sa social media, nga nagpakita kang Quiboloy nga nag-ingon nga si Pacquiao naggasto og wala mahuman nga Sarangani Sports Training Center kantidad og P3.5 bilyon. Gipakita niini ang mga guba na nga mga bleachers ug nanubo na nga mga sagbot sa pasilidad.

Si Quibuloy, suporter ni President Rodrigo Duterte, nagsulti atol sa iyang telebisyon station SMNI ug sa social media nga si Pacquiao mismo nalambigit sa kurapsiyon.

Gipagawas ni Quiboloy ang video human si Pacquiao nagsulti nga dunay mas halapad nga kurapsiyon sa gobyerno.

Sumala ni Pacquiao nga ang gipakita nga gambalay ni Quiboloy usa ka karaang pasilidad sa Sarangani Province Sports Complex.