KIDAPAWAN CITY -- Nadakpan ang duha ka mga gituohang drug pushers alas 2 sa hapon niadtong adlaw nga Dominggo, Disyembre 29, 2019 didto sa probinsiya sa Cotabato.

Nailhan ang mga suspek nga sila Nicanor Emita Jumao-as, 52-anyos, minyo ug nagpuyo sa Loyola Village, Digos City ug ang kauban niini nga si Reymond Sampaga De Leon, 25-anyos, ulitawo ug molupyo sa Dumalag 1, Barangay Matina Aplaya, Davao City.

Matud ni Pigcawayan chief of police Major Reynaldo Delantein nga nakadawat sila og impormasyon sa duha ka tawo nga sakay sa multicab kolor pula nga dunay dala nga dakong kantidad sa gidili nga druga.

Pag-abot sa mga suspek sa Barangay Capayuran Pigcawayan, Cotabato didto na sila giatngan sa mga pulis.

Narekober sa posisyon sa mga suspek ang upat ka dagkong pakite sa gituohang shabu nga nagkantidad og P1.3 milyon, mga drug paraphernalia, usa ka kalibre .22 revolver ug mga buhing bala.

Ang duha ka gituohang drug pusher gikan namalit og shabu diin pabalik na sila sa dakbayan sa Davao.

Niining kasamtangan, ang mga suspek gipangbalhog sa Pigcaayan PNP ug gitakda nga pasakaan og kasong pagsupak sa Republic Act 9165 o Comprehensive Dangerous Drugs Act of 2002 lakip na illegal possession of firearms. (Edgar Fuerzas)