MAGSAYSAY, Davao del Sur -- Gitakdang mahaw-as na sa lisod nga kadalanan ang mga molupyo sa mga bukirang bahin human gigahinan P163 milyones nga pondo sa Department of Agriculture (DA) ang proyekto nga access road sa pipila ka mga barangay.

Human mihimo og DA-Philippine Rural Development Project (PRDP) Regional Program Advisory Board meeting ang maong ahensya sa miaging semana, giaprobahan niini ang 9.45-kilometer road concreting sa mga barangay sa Bacungan, Dalumay, Malawanit, ug Glamang.

Gihangop sa mga opisyal sa lugar ang laing proyekto nga igahin sa ahensya sanglit dako kini og ikatabang sa mga mag-uuma sa lugar.

Nasayran nga sayon na lang unya ang pag-biyahe sa mga nag-unang produkto sa lugar sama sa saging cardava, cacao, mais, tubo, manga, ug lubi.

Gikalipay ni Mayor Arthur Davin ang gihan-ay nga proyekto sanglit makatabang kini sa paspas nga pagbangon sa ilang lungsod gikan sa kabangis sa kalamidad.

Aduna sab pipila ka parte sa mga dalan didto sa Crossing Blocon Dalumay padung Glamang farm-to-market road ang nadamyos human mitay-og ang kusog nga mga linog sa miaging tuig.

Sa kasamtangan, padayon ang rehabilitasyon sa lokal nga kagamhanan sa gobyerno ug pagplastar sa mga relocation site aron matabangan ang mga bakwit nga nawad-an og panimalay.