HAGONOY, Davao del Sur -- Nasakmit sa awtoridad sa Davao del Sur ang mokantidad sa P27 milyones nga ismagol nga sigarilyo atol sa gikasa nga hiniusang buy-bust operation sa kapulisan.

Usa ka alyas Marlon, 47-anyos, residente sa Hagonoy, ang nasikop sa mga pulis human nga malampuson ang gihimong operasyon.

Dihang positibo ang pagdawat sa suspek sa boodle money nga gigamit sa mga sakop sa Regional Special Operation Group-Davao, Digos City Police Station, Hagonoy Police Station, Regional Intel Division, Integrity Monitoring Enforcement Group, ug Bureau of Customs-Davao, gilayong giposasan ang suspek.

Nakumpiska gikan sa posisyon sa dinakpan ang 690 ka mga karton sa ismagol nga segarilyo nga mokantidad sa P27 milyon ug duha ka .45 nga pistola nga dunay mga buhing bala.

Depensa sa suspek, igo lang kining gibilin kaniya samtang gikasohan na kini didto sa korte.