TANANG manayaay sa Philippine Charity Sweepstakes Office (PCSO) naghinam-hinam sa dako kaayong premyo niini nga miabot na sa dul-an P400 milyon.

Sa ulahing draw niadtong Miyerkules sa gabii, Hulyo 6, 2022, sa 6/55 Grand Lotto nga dunay premyo nga P367,534,100, walay bisan usa nga nakakuha, hinungdan nga ang Dabawenyo nga si alyas Mario, taga Barangay Lapulapu, Agdao District, Davao City, mipatad nang daan alang sa draw niini Sabado, Hulyo 9, 2022.

"Paspas pa ang manguros sa swerte, kung ikaw gyod ang swerte anang dako-a, imoha gyod na, bisan pa og usa lang ka, pataran, ubanan lang sa mga pangandoy, magpositibuhon," ingon ni Mario, 49, ug kinse ka tuig nang drayber sa traysikel.

Sa ulahing draw sa 6/55 Grand Lotto, Hulyo 6, ang winning number combination mao ang 49-06-26-55-03-14.

Samtang bongga sab ang kadako sa dag-on sa 6/58 Ultra Lotto nga moabot na sa P71,756,993.60 nga dulaon karong alas 9 sa gabii, Hulyo 8.

Ulahing mananaug gikan sa Davao City niadtong Mayo 2021 diin nakuha niini ang jackpot nga P181 milyon sa winning combination 23-43-29-32-36-04 sa 6/45 Megalotto.