MOKABAT ngadto sa 39 ka bricks (bloke) sa ilegal nga druga nga cocaine ang narekober sa otoridad sa baybayon sa Barangay Santiago, Caraga, Davao Oriental, Dominggo sa hapon, Pebrero 24.

Sumala ni Senior Superintendent Marcial Magistrado, ang provincial director sa kapulisan sa maong lugar, nga Dominggo sa buntag nakit-an sa mga residente sa lugar ang upat ka dagkong karton sa usa ka butang nga gidagsa sa ilang baybayon.

Gilayon nga gipahibalo sa mga residente sa barangay kagawad sa lugar ang maong insidente, ug ang maong opisyal sa barangay nagpahibalo sa kapulisan.

Miaksyon dayon ang mga pulis ug gisuta ang sulod sa mga karton, ug nakita ang mga butang nga porma og bloke.

Gipahibalo dayon kini ngadto sa Philippine Drug Enforcement Agency (PDEA)-Davao, diin gilayon nga gikustodiya ang maong mga butang, ug gipailalom sa laboratory examination.

Segun ni PDEA-Davao director Antonio Rivera nga usa ka high grade cocaine ang maong mga bricks.

“Mokabat ngadto sa sobra P200 milyon ang kantidad sa maong mga cocaine nga nakuha sa baybayon sa Caraga, Davao Oriental,” pagkumperma ni Rivera.

Gibutyag sab ni Police Regional Office (PRO)-Davao director Chief Supt. Marcelo Morales nga nagbuhat sila karon og lawom nga imbestigasyon aron masayran kung kinsa ang nagdala niini ug ngano nga gidagsa kini sa baybayon.

Usa sa mga ginatan-aw nila karon ang usa ka international nga sindikato kinsa maoy mihimo sa ingon diin gipaagi sa sakyanan sa kadagatan.

“Mga international na sindikato ang may pakana nito kasi, hindi naman cocaine ang gamit ng mga drug addict dito, kundi shabu,” pagpasabot ni Morales.

Gani Lunes sa buntag, dugang tulo ka bricks ang narekober sa lugar ug nagtuo pa ang otoridad nga duna pay nahibilin niini ug padayon karon nga ginalibot ang maong lugar.

Samtang sa samang hitabo, alas-6:30 sa buntag niadtong Dominggo, mokabat sab P230-M cocaine bricks ang narekober nga moihap sab sa 34 bloke nga gituohang cocaine.

Ang maong mga bloke narekober sa duha ka mga mangingisda sa kadagatan sa Purok Santan, Barangay Bungtod, Tandag City, Surigao del Sur.

Sumala ni PNP-Caraga police director, Chief Superintendent Gilbert Cruz gitaho kanila sa mga mangingisda sa lugar nga duna sila’y nakit-an nga naglutaw-lutaw nga itom nga plastik sa kadagatan.