LIMA ka mga drug dealer ang nadakpan sa gilusad nga anti-drug operation sa mga awtoridad alas 10 sa buntag Oktubre 9 sa probinsya sa Lanao del Sur.

Giila ang mga suspek nga sila Lenlen Ampaso alyas Basit, 41, nagpuyo sa Barangay Poblacion, Kapatagan, Lanao del Sur; Johary Macarao, 24, ulitawo ug molupyo sa Marawi City; Amrodin Adel, 23, ulitawo nagpuyo sa Sapad Lanao del Norte; Proxy Rauring, 41; ug Abdul Sawaf Rauring, 19, pulos nagpuyo sa Barangay Basak, Lapu-Lapu City.

Gibutyag ni Philippine Drug Enforcement Agency- Bangsamoro Autonomous Region in Muslim Mindanao (PDEA-Barmm) Regional Director Juvinal Azurin nga nagpahigayon sila og drug buy-bust operation sa Purok 3, Barangay Poblacion Kapatagan uban ang mga sakop sa PDEA-Northern Mindanao, Kapatagan Municipal Police Station, Philippine National Police (PNP) Northern Mindanao Regional Intelligence Division ug PNP Special Operations Unit 6.

Atol nga gitunol sa mga suspek ang ilegal nga druga sa nagtakuban nga sakop sa PDEA-Barmm didto na sila gipangdakop.

Narekober gikan sa posisyon sa mga suspek ang shabu nga nagkantidad og P6.8 milyon, drug paraphernalia ug mga personal nga kagamitan.

Gikanayon ni RD Azurin nga dugay na nila nga gipanid-an ang mga suspek nga nalambigit sa large-scale illegal drug trade sa Lanao del Sur, Maguindanao ug mga Siyudad sa Cotabato lakip na sa Marawi.

Ang mga suspek ang gibalhog na sa PDEA-Northern Mindanao custodial facility diin sila gipasakaan na sa kasong kalapasan sa Republic Act 9165 o Comprehensive Dangerous Drug Act of 2002. (Edgar Fuerzas)