NASIKPAW ang magtiayon nga drug dealer sa gilusad nga anti-illegal drugs operation sa mga awtoridad alas 2:45 sa hapon niadtong Martes, Nobiyembre 24, 2020, sa probinsiya sa Lanao del Sur.

Giila ang mga suspek nga sila Busran Ampatua Saripada, 64, ug asawa nga si Monera Saripada, 46, mga molupyo sa Wao sa nahisgutang probinsiya.

Gibutyag ni Police Regional Office-Bangsamoro Autonomous Region Director Bregadier General Samuel Rodriguez nga nagpahigayon og buy-bust operation sa Wao ang mga sakop sa Regional Drug Enforcement Unit ug Wao Municipal Police Station.

Sa diha nga gitunol na sa mga suspek ang shabu sa pulis nga nagtakuban nga mopalit og druga didto na sila gipangdakop.

Narekober gikan sa mga suspek ang shabu nga nagkantidad og P6.8 milyon ug mga drug paraphernalia.

Gikanayon ni Rodriguez nga ang magtiayon nalambigit sa large-scale illegal drug trade sa Lanao del Sur, Bukidnon ug North Cotabato.

Mga suspek nagtingkagol na sa costudial facility sa Wao Municipal Police Station ug gipasakaan na og kaso nga kalapasan sa Republic Act 9165 o Comprehensive Dangerous Drug Act of 2002. (Edgar E. Fuerzas)