USA ka portable X-ray machine ang gipalit sa lokal nga kagamhanan sa Siyudad sa Tagum nga gamiton sa Tagum City Infectious Diseases Isolation Facility diin nagkantidad og P7 milyon ang maong ekipo.

Matud pa nga gipadali og human ni Mayor Allan Rellon ang maong isolation facility gumikan sa nagkataas nga ihap sa kaso sa Covid-19 sa siyudad.

Gibutyag sa City Health Officer Dr. Arnel Floriendo nga dakong tabang sa pag-diagnose ug pag-monitor sa mga pasyente nga adunay respiratory infections nga ma-admit sa isolation facility.

Adunay kapasidad ang maong isolation facility nga 12 ka pasyente nga adunay single airconditioned private rooms matag usa ang unang bahin ug aduna pud usa ka kwarto nga alang sa mag-pamilya.