KIDAPAWAN CITY - Muabot sa 1.4 kilo nga gituohang shabu ang nakompiska sa mga sakop sa Philippine Drug Enforcement Agency (PDEA-12) sugod bulan sa Enero hangtud Oktubre.

Kini ang gikomperma ni PDEA Soccsksargen Director Naravy Duquiatan diin suma niini nga gawas sa shabu, nakakompiska sab nila ang 1.6 kilo nga pinaugang dahon sa Marijuana ug 1000 fully grown marijuana plants.

Nagkantidad og P9.9 milyon ang shabu ug marijuana nga nakuha sa PDEA 12 sa ilang operasyon sa nagkadaiyang dapit sa rehiyon.

Moabot sab sa 288 ka mga drug personalities ang nadakpan sa PDEA 12 ug napasakaan og kaso sa kalapasan sa Republic Act 9165 o Comprehensive Dangerous Drug Act of 2002.

Gikanayon ni Duquiatan nga seryoso ang PDEA 12 sa ilang anti-illegal drug campaign diin ilang gipanid-an ang giingon nga mga Ninja Cops nga nalambigit sa illegal drug trade sa ilang area of responsibility (AOR).

Sa kasamtangan, gipalig-on pa sa PDEA 12 sa pakig-alayon sa kapulisan, military, NBI ug ubang law enforcement agency ang anti-illegal drug campaign sa gobyerno. (Edgar Fuerzas)