LUYO sa mga hugon-hugon nga siya mapildi tungod sa iyang edad, gipamatud-an sa Pinoy boxer Manny Pacquiao nga duna pa siya'y igong kusog aron pildihon ang way pilding si American boxer Kieth Thurman.

Nagkayamukat sa pagpanagang sa kumo sa 40-anyos nga si Pacquiao ang 30-anyos nga si Thurman nga nagbugno ibabaw sa ring sa MGM Grand, Las Vegas alang sa World Boxing Association (WBA) welterweight super world championship belt.

Midaug ang Pambansang Kamao nga si Pacquiao via split decision.

Tuod man, di sayon ang paglangkat sa kadaugan ni Pacquiao tungod sa iskor pa lang, dikit kaayo ang kinawrasay og kumo sa duha.

Ang mga hurado nga sila si Tim Cheatham ug Dave Moretti pulos mihatag og 115-112 nga iskor pabor kang Pacquiao, samtang si Judge Glenn Feldman mihatag og 114-113 pabor kang Thurman.

Sa unang round pa lang, gidabo-dabohan na si Thurman ni Pacquiao og sumbag nga miresulta sa iyang pagka-hagba.

Sa matag round balsanay ra ang duha, apan may higayon nga moatras si Thurman ilabi na og malandingan sa solidong kumo ni Pacquiao.

Luyo sa kapildihan mihirit pa og rematch si Thurman.

"My conditioning, my output was just behind Manny Pacquiao. It was a great night of boxing. I would love a rematch," matud ni Thurman.

Mitimbaya

Human sa kalampusan ni Manny Pacquiao batok Keith Thurman, mipaabot og pagtimbaya ang Malakanyang ngadto kang Pacquiao.

Sa pahayag pinaagi sa Presidential Spokesperson Salvador Panelo nga ang kadaugan ni Pacquiao kalampusan sa nasud.

“The Palace is one in rejoicing with the Filipino people as the Pambansang Kamao once again puts the flag above the pedestal with his displace of tenacity and courage,” matud ni Panelo.

Dugang ni Panelo nga nagmaya ang Pilipinas dihang nadepensahan ni Pacquiao ang iyang World Boxing Association welterweight belt batok American Adrien Broner.

“At the start of the year, Senator Emmanuel “Manny” Pacquiao made the whole country proud as he successfully defended his WBA welterweight belt over American Adrien Broner. Six months later, he doubled his feat as he defeated Kieth Thurman today via split decision, even knocking him down in the 1st round. Although his opponent, Thurman, is way younger than him, our pound-for-pound King did not show any signs of intimidation as he embodied what a Filipino spirit is all about – a fighter.”