ARON nga mas madugangan ang kahimsog sa panglawas sa mga residente sa Barangay 23-C, Davao City, mga mag-uuma nagtunol og mga presko nga produkto sa kaumahan.

Sa ikatulong adlaw niadtong Sabado sa hard lockdown sa barangay, gipaambit sa mga mag-uuma ang ilang mga presko nga produkto pinaagi sa City Agriculturist's Office, City Veterinarian's Office ug uban sa City Social Welfare and Development Office (CSWDO).

Sumala ni City Agriculturist Leo Brian Leuterio nga nakatigum sila og mokabat 480 kilos nga assorted vegetables gikan sa mga mag-uuma nga ilang gidonar sa mga residente sa barangay.

"The vegetables were donated by kind-hearted farmers of Marilog and the Davao Food Terminal Complex as food aid to the residents of Barangay 23-C," ingon sa opisyal.

Dugang ni Leuterio nga duna pay dugang 200 kilos nga moabotay nga mga gulayon gikan sa laing farmer organizations sa siyudad nga mahatud sa di madugay.

Sa laing bahin, si Dr. Cerelyn Pinili, Chief City Veterinarian, nagbutyag sab nga ang iyang buhatan mohatag sa og 2,000 kabuok dressed chicken alang sa lugar isip ilang inisyal nga ayuda.

Ang Davao City Social Welfare and Development Office nakahatud na og 6,266 grocery packs sa Barangay 23-C. (Jeepy P. Compio/CIO)