GILAGDAAN na ni Presidente Rodrigo Duterte niadtong Huwebes sa gabii, Hunyo 24, ang balaudnon nga mag-establisar sa Davao Occidental General Hospital.

Ang paglagda, gitambongan sa pipila ka mga miyembro sa Kongreso ug Malacañang, si Duterte miprirma og 16 ka balaod, 13 niini may kalambigitan sa panglawas ug hangyo alang sa pagdugang og bed capacity sa mga ospital sa nagkadaiyang bahin sa nasud.

Pipila niini mao ang House Bill No. 7321, gititulohan og "An Act Establishing A General Hospital in Barangay Lacson, Municipality Malita, Province of Davao Occidental To Be Known As The Davao Occidental General Hospital, And Appropriating Funds Therefor."

Matud sa presidente nga ang gobyerno nagkomitar nga mohatag ngadto sa mga katawhang Pilipino og "equitable and sustainable service" sa pag-atiman sa panglawas.

Gipasalig niya nga mga bag-ong balaod "make quality medical service more accessible to our peoples especially those in the far flung area."

Sumala ni Davao Occidental Representative Lorna Bautista-Bandigan, moabot sa tulo hangtud upat ka oras ang pagbiyahe sa mga molupyo sa probinsiya una makapahimulos sa serbisyo sa tertiary hospitals nga naa sa siyudad sa Davao.

Ang hospital kasamtangan nga gipailawom sa konstraksiyon sa Barangay Lacaron sa Malita, ang kapital nga lungsod sa probinsiya.

Gilauman nga magamit na sa una o ikaduhang kuwarter sa 2022, ang 100 bed-capacity nga ospital uban sa dugang mga yunit matag tuig aron modaghan ang "occupancy and services."

Namugna ang Davao Occidental niadtong Oktubre 28, 2016 nga gisaak gikan sa Davao del Sur human ang referendum. (RGL)