POLITIKA ang gituohang motibo sa pagpatay sa kanhi kapitan sa barangay ug sa iyang paryente alas 7:18 sa gabii, Dominggo, Agosto 14, 2022, sa Barangay Kidama, Matalam, Cotabato Province.

Ang namatay giila nga si Bobot Maluenda, kanhi kapitan sa Barangay Kilada ug iyang paryente nga trabahante nga si alyas Alex.

Gibutyag ni Cotabato Provincial Police Office Director Colonel Harold Ramos nga sakay ang mga biktima sa kotse nga gimaneho ni Maluenda sa Purok 3, Barangay Kidama sa dihang kalit silang gipamusil sa mga armadong lalaki daplin sa kalsada kinsa dali sab nga misibat human sa hitabo.

Gisapupo ang mga biktima sa mga nagresponde nga pulis ug mga miyembro sa Barangay Peacekeeping Action Team (BPAT) ug gidala ngadto sa balay tambalanan apan pulos nabugtuan sa kinabuhi human makaangkon og daghang samad sa lawas.

Nasayran nga si Maluenda dunay plano nga modagan pag-usab og pagka-kapitan sa taliabot nga Barangay and Sangguniang Kabataan (SK) elections. Magsaulog sab kini sa iyang adlaw nga natawhan Lunes, Agosto 15.

Padayong gisusi sa kapulisan sa Matalam Municipal Police Station ang insidente.