TAGA lungsod sa Compostela, Davao de Oro ang lalaki nga gipatay sulod sa payag sa Purok 18, Mahayahay, Barangay Cambanogoy, Asuncion gabii niadtong Mayo 24, 2023.

Kini maoy nigawas sa gihimong imbestigasyon sa kapulisan sa Asuncion Municipal Police Station nga nag-ila sa biktima nga si Eduardo Lesondra Supiter, 54, minyo, way trabaho, taga Purok 2, Brgy. Poblacion, Compostela sa nahisgutang probinsiya.

Giingon nailhan ang biktima pinaagi sa iyang identification card.

Base sa pamahayag nila Jonas Canedo ug Chryll Solibio, pulos molupyo sa Purok 18, Mahayahay, Barangay Cambanogoy sa Asuncion nga nagdula sila og bilyar sa dihang kalit lang nadungog ang sunod-sunod nga mga paka sa buto sa armas gikan sa payag sa usa ka alyas Alikar.

Daling gisusi nila Canedo ug Solibio ang gigikanan sa buto, uban sa mga kasilinganan, ug maoy nakit-an nila ang biktima nga nagbuy-od ug naglunang sa kaugalingong dugo.

Ang biktima nakahiagom og daghang mga samad pinusilan sa nagkadaiyang parte sa lawas, ingon man sa ulo, nga maoy hinungdan sa iyang kamatayon.

Narekober sa mga awtoridad gikan sa crime scene ang duha ka basiyo sa wala pa mailhing kalibre sa armas ug nasubay sab ang marka sa tunob sa tiil sa gawas sa payag nga gituohang iya sa suspek.

Patay'ng lawas sa biktima gipahiluna sa Escriba Funeral Homes samtang dugang imbestigasyon sa kapulisan sa Asuncion Municipal Police Station ang gilusad aron mailhan ug madakpan ang suspek.