GISUGDAN na Miyerkules, Nobiyembre 23, 2022, ang PalengQR PH diin ang pilot area niini mao ang Bankerohan Public Market, Davao City.

Ang City Government of Davao, sa pakigtambayayong sa Banko Sentral ng Pilipinas ug sa Department of the Interior and Local Government, milunsad og PalengQR PH Nobiyembre 23, 2022.

Ang PalengQR PH usa ka programa nga nagtumong sa pag-awhag sa mga establisemento sa paggamit sa cashless payment o quick response (QR) codes isip dugang nga opsyon sa mga pumapalit sa pagbayad, kini matod sa BSP Bank Officer IV ug Regional Economic Affairs Staff Mindanao Regional Office Ms. Zarinah S. Aligsao sa Davao City Disaster Radio niadtong Lunes.

“Under the PalengQR PH enjoined ang atoang merchants nga mag-display sa ilahang QR nga ang nakabutang 'We accept Gcash here.' Kon ikaw nga mamalit makita na nimo, pwede ka magbayad sa GCash," ingon ni Aligsao.

Dugang pa niya nga Miyerkules mao ang adlaw sa opisyal nga paglusad, adunay “onboarding” o registration sa mga merchant ug stakeholders ngadto sa mga financial service providers -- mga bangko, ug electronic money issuers.

Ang mga booth sa Landbank, Asia United Bank, Rizal Commercial Banking Corporation (RCBC), ug mga electronic money issuer nga Gcash, PayMaya, ug StarPay itukod alang niadtong wala pay account.

“Nag-set up sila didto ug booths sa Bankerohan, kung wala kay account sa mga na-mention nako nga FSPs pwede ka didto magbuhat og account pwede ka didto maghimo og account," ingon niya, kinsa midugang nga atimanon usab sa mga booth ang pag-imprenta ug ang lamination sa QR codes.

Ang onboarding dili limitado sa usa ka merkado publiko lamang tungod kay kini gilantaw nga ipahigayon sa ubang mga merkado publiko sa Davao City.

“Davao City will be the first city in Mindanao to adopt and implement this program,” ingon ni Aligsao.

Una niini, daan nang gipahibalo ang publiko nga ang bahin sa Marfori Street, gikan sa eskina sa Pichon Street hangtod sa Datu Bago Street, sirado sugod sa tungang gabii sa Nobyembre 21, 2022 hangtod Nobyembre 23 alang sa PalengQR-PH Program, apan ning adlawa, giablihan na.

Matod ni Aligsao nga win-win ang maong programa alang sa mga negosyante ug konsumidor tungod kay pinaagi niini nga programa, dili na maglisod ang mga negosyante sa paghimo og mga kausaban, ug alang sa mga konsumidor, mamenosan usab niini ang risgo nga makadawat og gisi nga mga bayranan. Sa presensya sa Covid-19 sa komunidad, ang cashless payment scheme makatabang usab sa pagpakunhod sa risgo sa pagkatap sa virus.

Dugang pa niya nga ang bag-ong digital cashless nga pagbayad makatabang sa pagpalapad sa mga potensyal nga kustomer nga naggamit sa digital ug cashless nga pagbayad.

Ang paglusad sa kalihokan gitambongan ni Deputy Governor, Regional Operations and Advocacy Sector sa Bangko Sentral ng Pilipinas Ms. Bernadette T. Romulo-Puyat, Regional Director Department of Interior and Local Government XI- Mr. Alex C Roldan, CESO V , Chairman sa Monetary Board ug Gobernador Bangko Sentral ng Pilipinas- Dr. Felipe M. Medalla, Sangguniang Panlungsod Chairperson, Committee on Trade, Commerce and Industry ug mga opisyal sa siyudad. (Jeepy Compio/Davao City Information Office)