BANSALAN, Davao del Sur -- Nasubo ang ubang sugarol human gipakatag na sa kapulisan ang impormasyong nagdili sa pagpasugal sa mga namatyan sa tanang barangay subay sa mando sa Philippine National Police.

Sagad sa mga namatyan adunay pasugal sama sa baraha, hantak ug mahjong pitsas.

Apan giratsada na sa pamunoan sa PNP ang mando sa pagpaundang sa tanang matang sa sugal sama sa ilegal nga last two, tari-tari, hantak, baraha ug uban pa bisan sa mga namatyan.

Apil sa pagadakpon ang mga mosugal sa lamay, pasabong ug hantak hinungdan nga gipahibawo na sa kapulisan ang mga opisyal sa barangay.

Gikompirma ni Major Peter Glenn Ipong, officer–in-charge sa kapulisan, nga nakig-alayon na sila sa mga opisyal sa barangay aron masayod ang publiko nga hingpit nang gidili ang bisan unsang matang sa sugal.

Giklaro sab niini nga wa nay mga tari-tari sa mga barangay sa lugar.

Ang ubang sugarol nga sama sa hantak naguol kay gihimo na nilang panginabuhian ang sugal.

Sumala ni Rico, 25, molupyo sa Brgy. Poblacion, nga sagad sa iyang ginaduwa sa mga lamay mao ang “tong-its”, Bet Game ug mahjong, gawas nga di sab magduka kon adunay sugal sa namatyan.

Gidason niini nga hayan wa nay molamay sa mga minatay gawas sa tagtungod na lamang ugaling did-an na ang pasugal sa patay.

Ang hantakero nga si Elias, 45, naguol sab kay matud niya nga makakuwarta gyud sila sa maong sugal.

Apan dili tanang sugal buwenas sanglit aduna say mouli nga wa nay mahibiling kuwarta sa bulsa.

Giangkon sa sugarol nga si Roldan, 31, nga pipila ka higayon sab nga mahutdan siya og kuwarta sa mga sugalan mao nga uyon na lamang kini nga undangon na ang tanang matang sa sugal.

Si Felisa, 36, kinsa kanunay nagdahom nga modaug sa Lotto, nagbutyag nga manimpad na lamang siya sa kanunay’ng pagtaya sa Small Town Lottery (STL) ilabi na nga usa ka higayon na siyang midaug og P4,500 sa iyang pagtaya sa Suertres.

Sa kasamtangan, hugot nang gibantayan sa kapulisan ang tanang matang sa pasugal ug nagbahad sila nga apil sa pagadakpon ang mga nanugal sa lugar. (Orlando B. Dinoy)