LIMA ka mga pulis ang gikatahong naangol diin ang usa niini talandugon ang kahimtang nga gidala sa tambalanan sa Dakbayan sa Digos human mahulog sa bung-aw ang gisakyan nilang patrol car.

Sa inisyal nga impormasyon gikan sa Davao del Sur Provincial Police Station, lima ka mga pulis ang nalambigit sa disgrasya diin ang usa kanila talandugon kinsa mga sakop sa Regional Mobile Force Battalion (RMFB) Davao Region nga gipangulohan ni Police Lieutenant Nico Avel Querubin.

Nahitabo ang insidente alas 12:40 p.m. Biyernes, Septiyembre 10, 2021, didto sa MPTC, Sitio Lutangan, Barangay Kapatagan, Digos City.

Giingon nga kalit nawad-an sa kontrol ang patrol car nga adunay body number 115 ug midiretso kini sa bung-aw nga dunay gibana-banang gilawmon 100 ka tiil.

Dali sab nga miresponde sa dapit ang mga kaubanang pulis ug gipang-rescue ang mga nalambigit.

Nagpadayon ang gihimong imbestigasyon sa hitabo samtang padayong giatiman sa ospital ang mga naangol.