TACURONG CITY -- Nanawagan karon og tabang ang pamilya sa usa ka domestic helper (DH) nga missing sa nasud Kuwait.

Giila ang biktima nga si Roda Apolinar Magtulis, taga Barangay Nuling, Lebak, Sultan Kudarat.

Matud sa igsoon sa biktima nga si Editha Floro nga hangtud karon walay tawag o text sila nga nadawat gikan kang Roda o kaha mensahe gikan sa iyang Facebook nga kini luwas na.

Bisan sa buhatan sa OWWA ug sa agency ni Roda wala sila’y nadawat nga tawag nga kini okay na sa iyang gi-trabahuan sa Kuwait.

Kini ang reaksiyon sa pamilya sa una nga taho nga migawas nga si Roda anaa na sa iyang agency o kaha sa Embahada sa Pilipinas sa nasud Kuwait.

Mukampante lamang ang pamilya sa biktima kung mutawag kini sa ilaha o kaha mga opisyal sa Embahada.

Giingon sa taho nga gipasakitan o kaha gi-maltrato sa iyang agalon si Roda sa Kuwait.

Hangyo karon sa pamilya sa Pinay DH sa Kuwait ngadto kang Presidente nga makauli sa Lebak nga buhi si Roda. (Edgar Fuerzas)