TACURONG CITY – Patay dihang nahidangat sa tambalanan ang usa ka opisyal sa Philippine National Police (PNP) nga giingong nagpusil sa kaugalingon alas 12:20 sa udto niadtong Biyernes, Septiyembre 13, sa probinsiya sa Sultan Kudarat.

Giila ang opisyal nga si Police Major Kristian Ace Palmes Sularte, 35, ulitawo ug nadestino sa Regional Mobile Force Battalion (RMFB) sa Police Regional Office 11.

Sa taho gikan sa Sultan Kudarat Police Provincial Office, nasayran nga nagpusil ang biktima sa kaugalingon sulod sa iyang kotse atbang sa balay niini sa Purok Osmeña, Barangay Poblacion Bagumbayan sa nahisgutang probinsiya.

Sa diha nga nadungog sa pamilya ang buto sa armas, ila dayon kining gisusi ug didto ilang nakita nga naligo na ang biktima sa iyang kaugalingong dugo sulod sa kotse.

Gidala pa si Sularte sa iyang pamilya sa Isulan Medical Hospital apan gideklara siyang dead on arrival.

Nakaangkon og samad sa ulo si Sularte nga maoy hinungdan sa iyang kamatayon.

Narekober sab sulod sa kotse sa pulis ang iyang armas nga .9mm pistol nga maoy gigamit niya sa pagkutlo sa iyang kinabuhi.

Daghan ang nagtuo nga posibleng dunay dakong problema si Sularte o depresyon ba kaha nga maoy hinungdan nga nagpakamatay siya.

Kapulisan sa Bagumbayan Sultan Kudarat way nakitang foul play sa kamatayon ni Sularte. (Edgar E. Fuerzas)