POSIBLENG motambong si President Rodrigo Duterte sa ika-123rd Rizal Day karong adlawa sa Davao City.

Mga tag-as sab nga opisyal sa nasud ang gituohang halandong bisita atol sa programa nga kauban sa pangulo.

Usa ka hamubo nga programa ang matigayon karong adlawa sa Rizal Park, ning siyudad diin halaran og bulak ang bantayog ni Gat. Jose P. Rizal.

Sa naandang programa, mosaludo ang mga kawani sa gobyerno sa bantayog ni Dr. Jose Rizal nga maoy simbolo sa kabayanihan niini sa iyang panahon.

Giingon nga human sa hamubo nga programa ang pangulo mosakay og helikopter padung sa M'lang, North Cotabato aron moduaw ug mohatag og mga pinaskohan sa mga biktima sa linog sa dapit.

Kauban sa pangulo si Senador Christopher Lawrence "Bong" Go nga himamaton nila North Cotabato Governor Nancy Catamco, Vice Governor Emmylou ”Lala” Mendoza, M’lang Mayor abogado Russel Abonado ug ubang opisyal sa probinsiya. (Jeepy P. Compio)