GISUBLI sa pagpasabot sa Police Regional Office (PRO)-Davao ang papel sa kapulisan sa pagpailawom sa Mindanao sa Martial Law nunot sa mga lihok protesta kagahapon sa mga progresibong pundok sa panawagan nga wagtangon na ang Martial Law.

Sumala sa suwat pamahayag sa PRO-Davao pinaagi sa ilang spokesperson, Chief Inspector Milgrace Cajes Driz, nga nakatabang sab og dako ang martial law sa ilang malampuson nga pagdumala sa police operations sa Davao Region.

"Martial Law is the declaration where the civil rights of the people is being suspended but evidently since it was declared, it was not violated nor abused by the authorities because of its high regard to Human Rights and Life's dignity," pagpasabot sa suwat pamahayag.

Giingong dako ang natabang sa Martial sa pagsumpo sa kriminalidad ug terorismo diin sa miaging mga bulan hangtud ning kasamtangan makita ang dako nga kabag-ohan sa palibot.

Sa managing police operations nakatabang ang Martial Law labi na sa kampanya sa operation kapkap, Oplan Bulabog, Oplan Sita, sa pagkasikop sa mga wanted persons, pagpatuman sa search warrants ug uban pa pinaagi na sab sa aktibong suporta sa komunidad ug sa Local Government Units.

Miubos sa ang crime volume ug mitaas ang Crime Solution Efficiency itandi sa wala pa gipatuman ang Martial Law.

"Evidently, that Martial Law has of great value to this effort of the Philippine National Police specifically here in Davao Region. Thus, the maintenance of peace towards change and development has a great impact," tipik sa pamahayag sa PRO-Davao. (JPC)