HOT pursuit operation ang gihimo sa General Investigation Section sa Talomo Police Station batok sa usa ka miyembro sa Sagrado Gang kinsa mipusil sa usa ka sakop sa pulis sa Talomo PNP.

Ang insidente nahitabo Lunes sa gabii, December 17 sa Seaside, Barangay Bago Aplaya, Davao City.

Ang biktima nailhang si Senior Police Officer (SPO) 1 Ferdinand Macion, kinsa niadtong mga taknaa nagpahigayon sila og Oplan Sita sa lugar.

Dihang ilang gisita ang usa ka tapok sa mga lalaki, gilayong mibunlot og wa matino nga matang sa armas ang suspek nga si alyas Randy, 18, nagpuyo sa lugar.

Human sa pagpamusil, gilayong misibat ang suspek ug gidali pagdala sa Southern Philippines Medical Center ang biktima kinsa nakahiagom og samad pinusilan sa iyang tiil.

Gibutyag ni Davao City Police Office (DCPO) spokesperson Ma. Theresita Plaza-Gaspan, wala kabantay ang pulis sa pagpusil sa suspek, ug dihang nagkadugo na ug nagtakiang na kini, wala na kini kaibot sa iyang pusil.

“Miyembro ang suspek sa Sagrado Gang sa Talomo District, noted na ang suspek, ug sa karon nagpahigayon na og hot pursuit operation ang atong PS3,” ingon ni Gaspan.

Sa kasamtangan, anaa na sa luwas nga kahimtang ang nasamdan nga pulis.