MANAY, Davao Oriental -- Patay na nga napalgan kinsa dunay igo sa ulo ug naglunang sa dugo sa iyang gihigdaan ang usa ka pulis nga si patrolman Police Officer 1 Pat Nonie Lad Badbadon alas 6:30 Martes sa buntag, Agosto 27.

Ang patayng lawas nakit-an sud sa kwarter sa 1st Davao Oriental Police Mobile Force Company (DOPMFC) sa Barangay San Ignacio, Manay.

Sa inisyal nga imbestigasyon sa Scene of the Crime Operatives (Soco) ug sa Manay Municipal Police Station, gituohang nag-suicide ang biktima ug walay foul play sa krimen.

"Marami pa kaming i-consider sa investigation, hindi lang hanggang suicide lang kami. Ongoing pa rin ang aming ballistic and autopsy. Pumayag naman ang relatives for autopsy," ingon ni Police Major Neil Richard Regalado, hepe sa Manay police nga nahinabi sa Superbalita Davao pinaagi sa telepono.

Luyo sa hitabo, dili makatuo ang uyoan sa biktima nga si Sammy Badbadon nga nag-suicide ang iyang pag-umangkon gumikan sa ilang nakita, wala kini problema ug walay uyab, diin bugtong gika-busy-han niini mao ang pagpunay og basa sa pulong sa Diyos.

"Buot ni siyang mag-pastor. Imposible kaayo nga mag-suicide ni. Dili mi katuo, kay una kung suicide, nasayod siya nga sala kini. Ikaduha, walay uyab ning bataa kay sa Sta. Ana PNP pa ni siya na-assigned sa una. Sa akoa ni tigsaka, walay uyab bisan sa iyang pagbalhin sa Manay PNP," tipik sa pagsaysay sa uyoang si Sammy pinaagi sa telepono.

Nasayran nga napalgan na lang nga naglunang sa dugo nga nagkulob sa gihigdaan ug wala nay kinabuhi si Badbadon, kinsa nagkupot sa .9mm isyu nga pusil sa iyang tuo nga kamot ug gition sa ulo.

"Isang tama lang sa ulo from right to left temple," sumpay ni Police Major Regalado.

Si Badbadon anaa sa kampo sa 1st DOPMFC, ubos sa Manay Municipal Police Station, human siya nabalhin gikan sa Sta. Ana Police Station ubos sa Davao City Police Office.

Ang patay nga lawas ni Badbadon gipailawom sa autopsy subay sa pagtugot sa mga kabanay.