KIDAPAWAN CITY -- Usa ka sakop sa kapulisan sa Arakan Municipal Police Station ang napatay samtang nagpatuman og arrest warrant batok sa kanhi sundalo alas 6:30 sa buntag niadtong Huwebes, Oktubre 22.

Hinuon, napatay sab ang kanhi sundalo nga si Sergeant Arnold Maligatong.

Gibutyag ni North Cotabato Police Provincial Office Director Colonel Henry Villar nga nagpahigayon og manhunt Charlie operation ang mga miyembro sa Arakan MPS batok kang Maligatong didto sa Sitio Pine Tree Barangay Libertad sa maong lungsod nga dunay warrant of arrest sa kasong pagpatay.

Apan nakigpinusilay ang suspek sa mga awtoridad hinungdan nga naigo sa dughan si Police Senior Master Sergeant Rofel Manuel.

Daling mibalos ang raiding team hinungdan nga napatay sab si Maligatong.

Sumala pa nga gihatud pa si Manuel ngadto sa Arakan District Hospital apan nabugtoan gihapon kini sa kinabuhi gumikan kay layo ang lugar sa ilang operasyon ug nahutdan og dugo.

Mibaha ang nagpadangat sa ilang pahisubo sa bayani nga si Manuel kinsa namatay atol sa iyang "tour of duty." (Edgar E. Fuerzas)