KASONG kriminal ug administratibo ang atubangon sa usa ka pulis kinsa giingong nag-maoy nga nakapahadlok sa katawhan alas 10:30 sa gabii niadtong Dominggo, Abril 5, didto sa Maa Bridge, Barangay Maa, Davao City.

Giila sa Talomo Police Station ang nasampit nga pulis nga si Police Corporal Jovien Bob Aboy Simon, 32 anyos, kinsa nadestino sa Buhangin Police Station.

Sa impormasyon gikan sa Talomo police, nasayran nga gireklamo ang maong pulis human kini alegasyong nag-syagit-syagit ug namato og balay dungan sa pag-syagit nga "Dili mo mogawas diha, kay putlan tamo og ulo."

Nasayran nga lango sa ilimnong makahubog ang maong pulis diin nagpositibo sab kini sa liquor test nga gihimo kaniya.

Kasong pagsupak sa Republic Act (RA) 11332 kun "Mandatory Reporting of Notifiable Diseases and Health Events of Public Health Concern Act," alarm and scandal ug light threats lakip na ang administrative case ang atubangon sa maong pulis.

Gidis-armahan na ang maong pulis ug gibalhog sa selda sa Talomo police, samtang gipamahayag ni Davao City Police Office (DCPO) Director Police Colonel Kirby John B. Kraft nga dili nila i-tolerate ang sayop nga mga binuhatan sa ginsakpan sa kapulisan ning siyudad.

"We will never tolerate such wrongdoing because it is a disgrace not just to our uniform but to the good men and women of the PNP who have given their lives fighting for truth, honor and integrity especially that our country is facing this war of an unseen enemy," pahayag ni Colonel Kraft.