DEAD on arrival sa Southern Philippines Medical Center (SPMC) ang usa ka giingong notadong tigpayuhot og ginadili nga drugas sa Agdao District, Davao City.

Alas 10 sa buntag, Hulyo 4, 2022, mobaligya og gituohang shabu ang usa ka alyas Ram Ram sa operatiba sa Tugbok Police Station hinungdan nga gikasa ang usa ka buy-bust pasado alas 3 sa hapon sa samang adlaw didto sa Barangay Centro.

Una niini, usa ka reliable confidential informant ang mitaho sa kapulisan sa Tugbok PNP labot sa pagpamaligya og gidiling druga sa suspek.

Sumala ni Police Major Michael Uyanguren, station commander sa Presinto 9, dugay na nilang gihupo-hupoan ang illegal nga lihok sa suspek niadtong siya pa ang hepe sa Sta. Ana Police Station 1.

Giingon nga notadong tigpamaligya og shabu ang suspek sa ilang barangay ug sa mga kasikbit nga dapit.

Atol sa operasyon, kalit suma pa nga mibunlot og pusil ang suspek aron pusilon ang nagtakuban nga pulis, apan naniyutralisa kini sa operatiba.

Nadala pa sa SPMC ang suspek apan nakabsan kini sa kinabuhi.

Mga pakite sa gituohang shabu, usa ka .38 revolver nga dunay mga buhing bala ang narekober gikan sa posisyon sa 37-anyos nga suspetsado.