PANGANDOY sa usa ka amahan nga person with disability (PWD) nga makahuman sa pagtungha sa koliheyo ang kamanghuran niya nga anak nga karon naa pa sa high school.

Kini mao ang pahayag sa 58-anyos nga PWD nga si Ernesto Puyot o Tatay Erning nga makit-an matag-adlaw sa Tagum Overland Transport Terminal nga nanginabuhi aron dunay ikapakaon sa pamilya ug ikapa-eskuwela sa kamanghuran niya nga anak.

Si Tatay Erning nga sagad makit-an gawas sa usa sa mga comfort room sa nahisgutang terminal.

Gisaysay niini nga duna siya'y tulo ka mga anak sa nagkalain-laing babaye nga nangagi sa iyang kinabuhi kon diin ang duha duna nay tagsa-tagsa ka mga pamilya ug ang nahibilin mao ang kamanghuran niya nga anak sa ikatulong binuhat nga nahimong kaabag sa iyang kinabuhi.

Matud pa nga ang maong anak nga nag-edad og 17-anyos anaa na sa senior high ug buot nga motungha sa koliheyo apan kung ang saligan mao ang iyang panginabuhian sa terminal maglisod siya pagpahuman sa anak sanglit dili kanunay nga daghang tawong maluoy nga mohatag kaniya og kuwarta.

Tungod niini, naglaum si Tatay Erning nga dunay tawo nga mo-isponsor o mopatungha sa iyang anak sa koliheyo.