GIPUSIL sa mga wala mailhing suspetsado ang rebulto sa Ginoo sulod sa Christ The King Parish Church sa Aglipay Street, Barangay Poblacion sa Kabacan, North Cotabato alas 3 sa kaadlawon Dominggo, Marso 7, 2021.

Sumala sa taho gikan sa kapulisan, nasayran nga gisulod sa duha ka wala mailhing tawo ang kapilya sa "Christ The King" sa nahisgustang dapit ug gipasipad-an ang rebulto niini pinaagi sa pagpusil sa makaduha ka higayon gamit ang kalibre .45 nga pistola.

Human sa pagpamusil, daling miikyas ang duruha sakay sa usa ka motorsiklo sa dihang nakatimaho nga nagresponde na ang mga miyembro sa Barangay Peacekeeping Action Team (BPAT) ug kapulisan.

Gihulagway nga naigo ang rebulto ni Jesukristo sa dughan ug paa nga bahin niini.

Ang maong hitabo gikondena ni Kabacan Mayor Herlo Guzman, Jr. nga dakong pagyaga-yaga sa tinuohang Kristiyano.

Kapulisan sa Kabacan Municipal Police Station padayon pang misubay sa hitabo aron nga mailhan ang mga suspek nga nagpasipala sa simbahan sa maong dapit.