SA WALAY pagduha-duha, gisulod sa usa ka fashion designer ang urban farming gumikan kay alang niya, gawas nga makasud-an, makuwartahan pa.

Gumikan sa pandemya, temporaryo nga gihunong ang mga events nga maoy usa sa mga source of income ni Ronnie Deleon Nacua, hinungdan nga iyang giablihan ang usa ka desisyon nga mosulod sa urban farming, samtang ang tanan anaa sa community quarantine.

“Nahunong ang mga events, mao ng gi-safety nalang nako sa bodega akong daghan kaayo nga mga gowns, so kay quarantine man, naisipan nako ang urban farming, naa man koy amigo, iya kung gitabangan aron maka-come up ko ani,” sulti ni Ronnie.

Pinaagi sa kakugi, determinasyon ug ang pagsalig sa kaugalingon, namugna ang RN Mushroom Farm diha lamang sa ilang balay sa Km. 8, Purok 8, Barangay Tigatto, Buhangin, Davao City.

“Pinaagi pod sa tabang sa programa sa Davao City, especially para sa mga miyembro sa LGBTQ+ (lesbian, gay bisexual, transgender, queer community) sa ‘Rainbow Magnegusyo Ta Day,’ nadugangan akong kapital para maka-mugna og ing-ani nga livelihood,” dugang saysay ni Ronnie, uban sa iyang kalipay nga misalig kaniya si Presidential Commission for the Urban Poor Commissioner Norman Baloro nga mamahimong benepisyaryo sa maong programa.

Sa una nga panud-an lang, karon nahimo na kining panginabuhian, gumikan halinon ang oyster mushroom nga mas lami kaysa kasagaran nga mushroom nga mapalit sa merkado.

Ang oyster mushroom mao ang Pleurotus ostreatus, usa ka edible mushroom nga unang nadiskubrehan didto sa nasud Germany sa World War 1 nga gipaturok ug misanay sa tibuok kalibutan isip usa ka pagkaon.

Daghan sab og bitamina ang oyster mushroom itandi sa naandang mushroom, busa tilawi na kay barato ra.

Available sab sa RN Mushroom Farm ang Oyster Mushroom Chicharon ug ubang mga produkto nga gama sa oyster mushroom.

Alang sa dugang pangutana kon asa mapalit ang oyster mushroom, kontaka si Ronnie sa numerong 0999-993-9004 ug bisitaha siya sa iyang Facebook: Ronnie Deleon Nacua.