BANSALAN, Davao del Sur -- Subling naminghoy mga sabongero human masayod nga gibakwi sa Inter-Agency Task Force (IATF) for the Management of Emerging Infectious Diseases ang pagtugot nga moabri na ang mga sabongan sa mga lugar nga ilawom sa modified general community quarantine (MGCQ).

Subay sa bag-ong resolusyon sa nasyonal nga IATF, gi-suspende niini ang pagpahigayon og mga pasabong sa mga dapit nga gideklarang ilawom sa MGCQ.

Usa ang sabongerong si Marcelo, 45, nga nalipay dihang gitugtan na ang pasabong sa lungsod sa Magsaysay kay andam siyang motamod sa guidelines nga dili magsiyagit-siyagit basta makasabong lang.

Giandam na sab unta sa 25 anyos nga si Ruel, taga Barangay Poblacion, ang talisay niyang manok kay itari unta karong Dominggo apan pakyas sa dihang nasayran ang balita.

Sama kanila, pipila na sab ka sabongero ang migasto og mga medisina aron i-kondisyon ang ilang mga manok panabong.

Apan sa nahitabo, gikumpara sa mga sabongero ngadto sa investment scam ang pagsirado sa sabongan.

Matud ni Jay-Ar Yu, 23, nga taga Magsaysay, daw sama ra sa Kpa ug Rigen ang nahitabo sa sabongan kay human miabri dali ra sab nga gisirado.