KIBLAWAN, Davao del Sur -- Nakurat ang mga molupyo sa Barangay Tacul human ilang nasaksihan ang pagpinaakay ug pagpatay sa duha ka dagkong bitin, adlaw’ng Miyerkules, Nobyembre 13.

Nakuhaan og hulagway ni Renato Daligdig ang mga bitin ug gi-post sa Facebook nga ni-viral pinaagi sa 308 engagements, 371 comments ug dunay 2.2K shares samtang gisuwat kining balita, Huwebes.

Nasayran nga anaa sa 11 ka piye ang gitas-on sa banakon samtang walo ka piye ang gitas-on sa sawa.

Ang mag-uumang si Junjun, nabutyag nga nag-away ang duha ka bitin sa iyang umahan human nakit-an siya sa banakon.

Nanaghap kini nga siya ang puntirya unta sa bitin sanglit mihana kini paggukod kaniya.

Apan gitukob na sa banakon ang sawa mao nga wa na siya mapaakan sa halas.

Gihulagway niini nga nakita niya nga anaa pa sa baba sa banakon ang katunga sa lawas sa sawa.

Human sa insidente, nakahigayon ang mag-uuma nga tigbason sa ulo ug lawas ang banakon ug namatay.

Gilayon sab nga gipahibawo niini ang mga opisyal sa barangay diin daling nakig-alayon sa Municipal Disaster Risk Reduction and Management Council.

Gipahibawo na sab nila ang Department of Environment and Natural Resources aron makahatag og abiso sa naalarmang mga molupyo.