HAGONOY, Davao del Sur -- Padung na sa pagkadugta ang patay'ng lawas sa mag-uuma dihang nabangalan kini sud sa iyang pinuy-anan sa Purok 6, Barangay Kibuaya, alas 8:00 sa buntag, Dominggo.

Nailhan ang biktima nga mao si Paterno Donaire, 51, ulitawo, molupyo sa nahisgutang lugar.

Sa inisyal nga imbestigasyon sa kapulisan sa Hagonoy Municipal Police Station, nasayran nga uwahing nakit-an ang biktima nga lango sa ilimnong makahubog niadtong Biyernes, Septyembre 27, sa gabii ug nakahimo pa kini pagpatad sa Small Town Lottery una niuli sa ilang balay.

Sumala sa imbestigador nga si Police Corporal Lloyd Camporedondo, nabali ang walang kamot sa biktima ug nilagom ang dughan human gilikosan sa sawa nga iya sab nga napatay human naputol ang ulo.

Nanaghap ang mga awtoridad nga nagdumugay pa ang mag-uuma ug ang bitin una niini natigbasan sa gitakin nga plamingko nga kanunay'ng dala sa biktima.

Nabangalan ang biktima nga anaa sa iyang tiilan nagbitay ang bitin nga natastas ang tinai samtang ang ulo nalagpot sa kolor puti nga plastic nga butanganan sa bugas.

Matud sa awtoridad nga posibleng nahutdan og hangin ang biktima tungod sa hugot nga paglikos sa sawa o di kaha giatake sab kini sa altapresyon.

Nasayran nga sa wa pa nahitabo ang insidente, nanabi na ang biktima sa iyang mga silingan nga magpatay gyud sila sa bitin ugaling iyang makit-an sanglit nagduda kini nga maoy hinungdan nga daghan sa iyang mga manok ang gipangkaon sa halas.

Wa na gipailawom sa otopsiya ang patay'ng lawas sa biktima sanglit nanimaho na kini mao nga gihaya na lang sa usa sa mga punerarya sa dakbayan sa Digos.