DIGOS CITY -- Nagpahimangno ang Digos City Police Office (DCPO) sa publiko nga di magpailad sa mga text o tawag nga mo-order og pagkaon gamit ang ngalan sa mga opisyal o negusyante kon way balidong impormasyon.

Sumala ni Police Lieutenant Colonel Ernesto Castillo, hepe sa DCPO, nga mao na sab kini ang bag-ong modus sa ubang scammer nga magpaila nga nag-trabaho sa buhatan sa gobyerno o kaha staff og politiko.

Estilo sa maong modus ang pag-order og pagkaon ug paapilan kini og load diin ang bayad inig deliver na sa pagkaon nga gamit ang mga ngalan sa mga iladong opisyal.

Una nang nabaniog ang maong estilo sa lungsod sa Bansalan, Davao del Sur diin nabiktima mismo ang usa ka opisyal sa lugar.

Sumala sa kapulisan nga mahimong itaho gilayon kanila aron madakpan ang mga suspek.

Angayan sab nga magduda na ang usa ka indibiduwal kon adunay hangyo nga pa-loadan ang ilang cellphone sa nagtawag nga numero.

Gumikan niini, giawhag sa DCPO ang publiko nga motawag gilayon sa ilang hotline numero 09399240779 aron makahatag sila og aksiyon sa maong modus. (Orlando B. Dinoy)