NAGPASIDAAN ang Securities and Exchange Commission (SEC) ngadto sa mga nagpakatag og pekeng impormasyon kalabot sa subling pag-abri sa non-stock ug independent religious corporation kinsa nalambigit sa giingong investment scheme.

Sa gipaguwang pahayag sa SEC niadtong Martes, giklaro niini nga "false claims" ang ginasabwag nga impormasyon sa Kapa Community Ministry International Inc. sa social media nga giingong giproseso na nila ang mga dokumento aron makabalik sa operasyon.

Sumala sab sa SEC nga wa say kamatuoran nga ang Bangko Sentral ng Pilipinas mitugot na sa maong investment scheme tungod sa ilang aplikasyon alang sa pagkuha og secondary license aron makabaligya ug motanyag og securities ngadto sa publiko.

"We enjoin the investing public to be more discerning with and critical of any promises and persuasions made by fraudsters," pahayag ni SEC Chairperson Emilio Aquino.

Gipasabot sa SEC nga usa ka "Ponzi" scheme ang gihimo sa Kapa ug di tinuod nga modato ang mga kabus niini.

Tungod sa gihimong freeze order nga gipangayo sa SEC ug Anti-Money Laundering Council ngadto sa Court of Appeals, napugngan sab ang mga bank accounts ug ubang assets sa Kapa.

Gitataw sa SEC nga kini maoy hinungdan nga di na mahatag sa Kapa ang ilang gisaad sa mga investors nga mauli ang kuwarta.

"When presented an investment opportunity, take time to verify the legitimacy of the company, especially their authority to solicit investments from the public, and to understand how the promised returns will be generated and delivered," panapos ni Aquino.

Sa nahitabo, misamot kaguol ang mga investors sa Kapa sama kang Ginang Catalina de Dios, 58, sa dakbayan sa Digos, human nga nabaligya niini ang iyang basakan aron ipuhonan sa maong investment. (Orlando B. Dinoy)