DAVAO DEL SUR -- Mokabat sa 500 ka mga pulis ang gipakatag na sa dakbayan alang sa pagpahugot sa seguridad tungod sa dakong kalihukan sa Simbahang Katoliko karong adlawa, Lunes, Pebrero 11.

Si Senior Superintendent Alan Manibog, provincial police director, maoy nangulo sa send-off ceremony, alas 3:00 sa hapon, Biyernes, Pebrero 8.

Giklaro ni Manibog nga hugot nilang ipatuman ang "No backpacks policy" palibot sa Mary Mediatrix Cathedral of All Graces sa dakbayan sa Digos, diin pagahimuon ang seremonyas sa konsagrasyon ni Bishop-elect Ronald "Bong" Lunas, alas 2:00 sa hapon.

Naghiusa ang puwersa sa Davao del Sur Police Provincial Office, 39th Infantry Battalion, Philippine Army, Bureau of Fire Protection, Provincial Disaster Risk Reduction and Management Council, Quick Response Team ug mga barangay tanod aron nga hugtan ang seguridad sa maong kalihukan.

Nangandam na sab ang Archdiocese of Digos sa usa ka di malimtang okasyon diin dinhi mahitabo ang labing unang higayon nga adunay pari nga mahimo nga obispo sa Davao del Sur.

Samtang, gitakdang motambong ang 40 ka mga obispo, kapin 200 ka kaparian ug 3,000 ka delegasyon gikan sa nagkadaiyang dapit sa Pilipinas ug sa laing nasud.

Gitataw ni Manibog nga usa ka dakong hagit kanila ang maong kalihukan sanglit gikinahanglan ang mas lig-ong seguridad.

Way kompiyansa ang kapulisan human sa nahitabong pagpamomba sa Simbahan didto sa Jolo, Sulu mao nga gihugtan nila ang pagbantay sa ordinasyon.

"Patterned to the Major Event Security framework, all the security elements and the necessary factors are in place. With the grace of God Almighty, we are confident that this activity will take place peacefully," panapos sa opisyal.