SELOS sa negusyo ang gilantaw sa mga awtoridad nga motibo sa pagpusil patay sa langyaw nga negusyante ala 1:15 sa hapon, Huwebes, Septyembre 8, 2022, sa Cotabato City.

Giila ang biktima nga si Mohamed Rifard Siddeek, 46, Sri Lankan national ug nagpuyo sa Barangay Semba, Datu Odin Sinsuat, Maguindanao Province.

Gibutyag ni Cotabato City Police Office Director Colonel Quirubin Manalang nga panaug unta si Siddeek sa gimaneho niyang mini van sa Megamarket sa Barangay Mother Poblacion sa dakbayan sa dihang kalit siyang giduol sa usa ka wala mailhing tawo ug gipusil gamit ang kalibre .45 nga pistola.

Daling misibat ang suspek human sa pagpamusil ug misakay og motorsiklo sa kauban niya nga naghulat kilid sa kalsada.

Samtang ang biktima daling gisapupo sa nagresponde nga mga pulis ug gidala ngadto sa Cotabato Medical Specialist Hospital apan gideklara siyang dead on arrival human makaangkon og pinusilan sa tangkugo, nawong ug likod.

Hinuon, mga pulis sa Cotabato City Police Office padayon ang gihimong imbestigasyon sa hitabo.