GIKINAHANGLAN anaa ang makanunayon nga pag-amping sa pagmaneho og bisikleta, kini ang pahimangno sa awtoridad human nga usa ka 52-anyos nga lalaki ang aksidente nga nalatayan sa wing van ug namatay pasado alas 7 kagahapon sa buntag, Mayo 19, 2022, didto sa Purok 3, Barangay Magdum sa Dakbayan sa Tagum.

Sa sketchy report sa Tagum City Police Station, nasayran nga ang biktima nailhang si Edwin Pacatang, 52, minyo, ug residente sa Purok Margarita, Barangay Mankilam sa maong siyudad.

Giila sab ang drayber sa Mitsubishi wing van nga dunay plate number RJR 677 nga si Roger Ringconada Concha, 46, minyo ug residente sa Purok 1, Siocon, Compostela, Davao de Oro.

Giingon sa sketchy report nga nawad-an og kontrol ang biktima sa pagmaneho niini sa iyang bisikleta hinungdan nga nahagba sa kalsada ug nalatayan sa wing van.

Sensitibo kaayo ang hulagway nga mikatap sa social media sa nahiagoman sa biktima.

Gitangtang na sab ang post sa babayeng netizen nga unang naka-post sa hitabo subay sa hangyo sa pamilya sa biktima, apan dunay mi-record sa kuha nga video ug aduna nay daghang mga post niini.

Hangyo sa pamilya sa biktima nga kung mamahimo di na i-share ang maong post.

Ang patay nga lawas sa biktima gipahiluna na sa iyang mga kabanay samtang ang drayber sa wing van temporaryo nga gikustodiya sa kapulisan sa Tagum City PNP.