COTABATO CITY -- Nagtinabangay ang mga pulis sa pag-ayo sa simbahan nga girakrakan sa mga teoristang grupo sa Bangsamoro Islamic Freedom Fighters (BIFF)-inspired group sa Islamic State of Iraq and Syria (ISIS) human sa pag-atake sa usa ka barangay sa Datu Piang sa Maguindanao Province.

Mismong si Police Regional Office-Bangsamoro Autonomous Region (PRO-BAR) Director Brigadier Samuel Rodriguez ang nagmando sa kapulisan sa Datu Piang Municipal Police Station sa lungsod nga magtinabangay sa pag-ayo sa Saint Therese Parish Church.

Kahinumdoman nga niadtong Disyembre 3, alas 10:30 sa gabii, misulong ang 50 ka terorista nga gipangulohan nila Kumander Karialan Saga Animbong ug Kumander Motorola sa nahisgutang barangay.

Nagpaarak sa ilang mga armas ang mga terorista sa kabalayan ug gipunting pa nila ang simbahan.

Gisunog sab sa mga terorista ang police patrol car ug outpost sa pulis una miatras human ma-engkuwentro ang mga awtoridad.

Nangabuak ang salamin sa simbahan ug nangaigo pa ang mga rebulto., hinungdan nga mitabang ang PRO-BAR sa pag-ayo sa simbahan uban ang kura paroko nga si Fr. Denz Evardone Basadra.

Gikalipay sab sa mga kaparian, mga madre ug parokyano sa Saint Therese Parish ang pagtabang sa kapulisan.