NAUNLOD sa dagat ang mokabat traynta ka mga tawo kinsa nanimba human nahugno ang balay nga gihimong simbahan sa usa ka Born Again Christian Dominggo sa hapon, Marso 3 didto sa Barangay 22-C, Poblacion, siyudad sa Davao.

Subay sa spot report gikan sa Davao City Police Office (DCPO) gilayong miresponde ang WASAR team, alert team gikan sa Sta. Ana Police Station ug usa ka Squad gikan sa Uban Search and Rescue (USAR) team sa Davao City Central 911 Emergency Response Center ingon man ang Task Force Davao nga gipangunahan ni Lieutenant Clayford Gabino.

Sumala ni Pastor Jessie Orque, ang pastor sa naasoy nga simbahan, nga samtang nagpadayon ang misa, kalit nga nahugno ang maong balay nga adunay mga deboto nga mokabat di momenos 30 ka mga tawo.

Nagkapa-kapa ang mga biktima sa tubig ug gilayong nangadto sa daplin diin nasuta nga adunay tulo ka mga tawo ang nasamdan atol sa hitabo.

Nasuta sab nga adunay tulo ka mga Australian National ang anaa sa maong misa kinsa kabahin sa maong kongregasyon ang naluwas sa mga rescuers.

Ginagmay lamang ang nahi-agoman nga mga samad sa tulo ka mga tawo kinsa dali sab nga gipangtambalan sa medical team sa USAR.

Migula sa imbestigasyon nga gabok na kaayo ang maong balay hinungdan nga nahugno kini sanglit nagbarog kini sa tubig-dagat.