BANSALAN, Davao del Sur -- Aron mahupay ang kamingaw sa ilang mga pamilya, gipaagi na lang sa pagpa-zumba sa mga na-stranded nga biyahero gawas sa ilang mga tent nga temporaryong gipuy-an sa Kinuskusan Elementary School, Barangay Kinuskusan.

Gumikan sa gipatuman nga regionwide lockdown sa Davao Region, pipila ka mga stranded nga mga pasahero temporaryong mitiner duol sa Kinuskusan checkpoint kinsa gihimoan og tent sa barangay ug kapulisan sa dapit.

Sanglit wala pa nahuman ang lockdown subay sa pagpatuman sa enhanced community quarantine (ECQ), giabagan ang mga stranded nga biyahero sa mga opisyal sa barangay ug sa 2nd Platoon sa Davao del Sur Public Mobile Force Company (DSPMFC).

Gawas sa pagdalit og pagkaon, mopahigayon sab sila og zumba session diin ang tanang miapil ug nakasuot pa sa ilang mga kataw-anan nga costumes uban sa pagpabilin sa social distancing aron malikay sa local transmission sa coronavirus disease (Covid-19).

Sumala sa DSPMFC nga kabahin kini nga aktibidad sa pagpataas sa mental nga pagpahimsog sa usa ka tawo ug aron sa gamay nga pamaagi mahupay ang ilang kamingaw sa pamilya samtang padayon ang pagpatuman sa ECQ.

Ang zumba gipangunahan ni Barangay Captain Arnold Mercado, uban sa mga personahe sa 2nd Platoon sa DSPMFC nga gipangulohan ni Police Captain Jocyviel S. Zamora. (Jeepy P. Compio)